වෙසක් සිසිලෙන් ලොවම සැනහේවා!!!!!
බෞද්ධයන්ගේ ප්‍රධාන ආගමික උත්සව අතරින් මුල් තැනක් වෙසක් උත්සවයට හිමිවෙයි.එය යෙදෙන්නේ මැයි
මස පුරපසළොස්වක පොහොය දිනයට යි.
බෞද්ධයන්ගේ මුදුන්
මල් කඩක් වන් වෙසක් උත්සවයේ නිමිත්ත ලෙස සැලකෙන්නේ ක්‍රි.පූ.623 මැයි මස පසළොස්වක පොහොය
දිනයේ සිදු වූ බුදුරජාණන් වහන්සේගේ උපත, ක්‍රි.පූ.588 මැයි මස පසළොස්වක පොහෝ දින
සිදු වූ බුද්ධත්වයට පත් වීම සහ ක්‍රි.පූ.543 මැයි මස පසළොස්වක පොහෝ දින සිදු වූ
පරිණිර්වාණය යන කාරණාත්‍රය යි.
වෙසක් පුන්
පොහෝ දින බුදුන් වහන්සේගේ ජීවිතයේ වැදගත් සිදුවීම් (තෙමඟුල) සැමරීමෙන් උන්වහන්සේගේ
ජීවිත කාලය තුළ සිදුකළ මහා මානව මෙහෙවර ඇගයීම සහ උන්වහන්සේ වදාළ මාර්ගයට අවතීර්ණ
වීමට සිත මෙහෙයවීමකි.
බෞද්ධයෝ තම
සිතෙහි තිබෙන භක්තිය,ශ්‍රද්ධාව නිරූපණය සඳහා විවිධ වූ ක්‍රියාකාරකම් වෙසක් සමය තුළ
සිදු කරති.ප්‍රත්පත්ති හා ආමිස පූජා වශයෙන් පුණ්‍ය ක්‍රියා වලට සහභාගී වෙයි.
සිල් රැකීම්, දන් දීම් හා භාවනා කිරීම ආදිය ප්‍රතිපත්ති පූජා වශයෙන් ද, වෙසක්
පහන්, වෙසක් තොරණ,සැරසිලි හා වෙසක් පෙරහැර ආදිය ආමිස පූජා වශයෙන් ද සිදු කරමින්
බුදුන් වහන්සේට ගෞරව දක්වමින් පිලිවෙත් සිදු කරයි.
මුළු රටේම
බෞද්ධයන් පොදු අරමුණින් හා ආගමික භක්තියෙන් යුතුව පවත්වනු ලබන උත්සවයක් නිසා මෙහි
තිබෙන සමාජයීය හා ආගමික අගය ඉතා ඉහළය. සමාජයීය හවුලක් නිර්මාණය වීම ආදී අවස්ථා ද ඇති
වේ. අද වන විට ඒ නිර්මාණය වූ එකමුතුවෙන් දිනා ගත් දෑ බොහෝය. ඒ අතර වෙසක් පොහොය
නිවාඩු ලබා ගැනීම, වෙසක් සතිය තුළ සත්ත්ව ඝාතනය තහනම් කරවීම සහ මස් විකිණීම තහනම්
කිරීම ඉන් කිහිපයකි.
අද වන විට
වෙසක් පොහෝ දිනය වෙනුවෙන් වෙසක් සතිය වශයෙන් වෙසක් කලාප වෙන් කරමින් අවකාශය විහිදුවා
ඇත. මෙදින පවත්වන දන්සල්, වෙසක් තොරණ,රාත්‍රියේ වෙසක් නැරඹීම හා පහන් කූඩු ද වෙනමම
සංස්කෘතියක් නිර්මාණය කරයි. වෙසක් පොහොය දින බහුතරයක් දෙනා මේ කටයුතු වලට සම්මාදම්
වෙයි.
අතීත රජවරුන් ද
වෙසක් පුන් පොහෝ දිනය අති උත්කර්ෂවත් අන්දමින් පැවැත්වීමට පියවර ගෙන ඇත. අද ද
වෙසක් උත්සවය සඳහා රාජානුග්‍රහය නොමදව ලැබේ. සියළු දෙනා ම එක් වී ආමිසයෙන් හා ප්‍රතිපත්ති
පූජාවෙන් මෙදින පුණ්‍ය ක්‍රියා වල නියැලීම වැදගත් ය.
ඉෂානි හංසිකා අමරදිවාකර
No comments:
Post a Comment